الأردنية فيدرا تحلم بتقديم قصة حياة داليدا.. وتعلّق أنا شبه داليدا

قالت الفنانة فيدرا، إنها تحب القصص الدرامية المبنية على أشخاص وحياتهم والسير الذاتية، مشيرة إلى أنها إذا اختارت أن تقدم قصة حياة شخصية ما فستختار المنتجة آسيا لأنها كما وصفتها علامة في الفنون وكانت في عصرها تفكر بشكل مختلف ومتفرد.

وأضافت فيدرا، في تصريحات إذاعية، أنها أيضًا مهتمة بتقديم قصة حياة الفنانة الراحلة داليدا بعدما أجمع المحيطون بها أنها تشبهها إلى درجة كبيرة قائلة: كل الناس بتقول لي أنتي شبه داليدا، فلو جت لي داليدا هعملها أكيد، وبحبها جدًا وما كنتش عارفة إني شبهها غير أما كل الناس فضلت تقول لي كده، موضحةً: اسمي الحقيقي فيدرا وكنت فرح في بداية حياتي الفنية لكن رجعت فيدرا تاني، أستاذ داوود عبد السيد هو اللي كان أطلق عليا اسم فرح.

وعن سبب اعتذارها عن الاستمرار في مسلسل وسط البلد قالت فيدرا: لأن كل حد له ترمومتر إمتى أوقف وإمتى أكمل، وأنا خروجي من المسلسل كان مع الجزء الأول من العمل، لأن لما تكون حاجة كويسة بتبقى عاوزة تخرجي منها وهي لسه كويسة، وزملائي وأنا كنا زعلانين مع نهاية الموسم الأول، فيه فرق بين مسلسل 30 حلقة ومسلسل مكمل طول السنة زي وسط البلد، التركيبة دي ما كنتش هعرف أكمل فيها سنة تانية وتالتة.

أما عن دور كاميليا الذي تقدمه خلال أحداث مسلسل إيجار قديم أمام الفنان شريف منير، قالت: كاميليا مش شبه شخصيتي في الحقيقة، لكن بحب البهجة وخفة الدم وبكره النكد والشكوى، وبحب الناس اللي شايفين النص الحلو دايمًا.

وأوضحت أن المسلسل كان يتم تصويره في نفس وقت عرضه، وأنها لا تفضّل هذا الأمر: ما بفضّلش العرض وقت تصوير المسلسل، ما بحبش الزنقة دي، عشان دايمًا فيه ضغط العرض والمسئولية، إلا أن المسلسل ده كانت أجواؤه حلوة فبنشيل بعض، وميمي جمال طيبة وحنينة وشربات بجد، وهي عاملة دورها كده زي شخصيتها.

وأكدت فيدرا أنها لا تعتمد على كون المسلسل ضمن موسم رمضان أو خارج الموسم، موضحة: مش مؤمنة بموضوع المواسم زي موسم رمضان، لأن المفروض الفن شغال طول السنة، وطول السنة الحلو الناس هتشاور عليه، لأن مش دايما اللي بيتعرض في رمضان بينجح، بدليل إن إيجار قديم عامل نجاح كويس بره رمضان، وأنا بشتغل اللي عاجبني سواء في رمضان أو غير رمضان.

واختتمت فيدرا حديثها، قائلةً: الناس محتاجة تتفرج على حاجة مريحة للأعصاب بعيدًا عن الساسبنس والأكشن، رغم إني بحب أتفرج عليهم بس ببقى عارفة إني هتعب، ده في المشاهدة، لكن أنا بشتغل ساسبنس عادي.

المصدر: القاهرة 24