سيدنا يطول عمرك فكنا من ملعوني الحرسي
كتب ماجد القرعان
معذرة اكتب مقالتي اليوم الموجهة الى سيد البلاد حفظه الله ورعاه بلهجة الأباء والأجداد وعليوم تفلت من اللي حوله عشان يقراها .
أول باب يا حفيظ الصحة والسلامة احنا وأهلنا بخير ما دومنا مستظلين بخيمة الهاشميين بقيادتكم ربي يحفظكم ويطول عمركم ويحفظ سيدي وولي عهدكم السند والعضد الأمين .
خوفنا يا سيدي مش من ترامب ولا من الصهاينة ولا من اللي بيشد على أياديهم وعلى يقين ومتأكد مية بالمية انهو ما الهم خبز عندنا بقيادتكم المشرفة والتاريخ يشهد منذ تأسيس المملكة الأردنية الهاشمية بس خوفنا من شلة الأونس اللي بيلعبوا وبchذبوا عينك عينك واللي وأكثر ما بهمهم كروشهم لأنهم ما تعودوا على الحلال واللقمة النظيفة
مثل هذول يا سيدنا معشعشين في كل قرنة بالبلد وبتحس انهم شلة وحدة وعصابة لكن ربك الحامي والله يستر من الجايات ما دام ملعوني الحرسي بينا وبتنطنطوا من علية لعلية ليقشقشوا الأخضر واليابس ما بعفوا عن شي وبزرطوا عن جنب وطرف العجر والمخمج وهرعيهم مبرطعين ومش سائلين باللي بصير فينا من قلة الحيلة حتى نعيّش ولادنا ونربيهم مثل ما ربونا اهالينا على حب تراب البلد وحب قادتنا من نسل الرسول عليه الصلاة والسلام وتصور سيدي حتى المقمط في السرير بيوكل وبيشرب وبتدلل من تخمخمهم الحرام احسن منا يللي تعودنا نchمخ التراب وما نسأل عشان نحمي بلدنا .
وين صارت سيدنا وفي أي بلاد أنه صربة من البشر ما بزيد عددهم عن 150 حفرتلي ( حكى عنهم النائب حسين العموش تحت قبة النواب ) بتنطنطوا من كرسي لكرسي يوم وزير ويوم نائب ويوم عين ويوم رئيس مجلس ادارة واذا زهقوا أو فطسوا بحل محلهم ابن او ابنة او واحد من عصبتهم ومعقول جيناتهم مش زي جينات باقي البشر .
ومعقول سيدنا انه نسوان بلدنا بطلن يخلفن مثل وصفي وهزاع وعبد الحميد شرف وممدوح الصرايرة ومحمد عودة القرعان وعبد الوهاب المجالي وعاكف الفايز وشفيق ارشيدات وعبد الحليم النمر وصالح المعشر وفيصل الجازي وغيرهم الميات من الزلم اللي ما بخافوا الا من الله … ان قالوا فعلوا واللي على ظهورهم صارت هالبلد .
معقول الدنيا اسودت وإقفرت ومش قادرين نشوف غير هذول واللي اغلبهم ما ترك بصمة خير يتذكرها الناس في المطارح اللي انحطوا فيها بقدرة قادر .
شلون بدي اثق بمؤسسة على سبيل المثال فيها شخص كان يقرش الحراكيين سنة 2011 عشان يزعزعوا أمن الدووولة وتنطط على ثلاث مواقع حتى الآن وشخص امتهن العمالة الخارجية من صغره وسجلات رواتب واعطيات اعداء الوطن تشهد على ذلك ( تنظيمات خارجية وخلافه ) وآخر كان قطروز وما بنفرشله فراش وغيرهم اللي هبطوا بالبراشوتات دون احم ولا دستور وما بيعرفوا الخمس من الطمسة ولا حارتنا وحتى قرى المملكة وما تعودوا يشتروا بندورة وبطاطا من الحسبة أو عن البسطات .
اللي بيقهرني وبجنني يوم اسمع مسعووووول وهو بيقول انه بنفذ هذا العمل بناء على توجيهات سيدنا وكانك انت من اجرى الدراسات والمخططات ورسم خطوات العمل وحدد الكلف وفترة الإنجاز … ميلة تميلهم ويغص بالهم ويسطهم على قلة فهمهم فعلا اللي بيستحوا ماتو .
احنا بنعرف وبنفهم لما تلتقي الناس أو لما تكلف بتشكيل الحكومات انك بتحط بالخطوط العريضة شو لازم يعملوا عشان تتحقق احلامكم وتطلعاتكم حتى تكبر دولتنا ويعيش اهلها احسن عيشة بس اللي مش قادرين نفهمه ونستوعبه ليش ما في عقاب وثواب وعليوم لو بطانتك بحطوك بالصورة أول بأول وانا متأكد انك ما راح تسكت على هيك لغوصة ونشترة ولعانة حرس .
سيدي براينو الناس ساكته ومتحملة هالشلل الغضيبة والبغيضة والعاقة بس خايف يجي يوم يطلعوا الناس عن طورهم ويلعنوا سنسفيلهم واحد واحد مش عشان انفسهم عشان يقطعوا دابرهم حماية للوطن وقيادتهم لأنه إيمانهم راسخ بخيمة الهاشميين مظلتنا الوحيدة شاء من شاء وأبى من أبى .
كلامي السابق لا يشمل المؤسسة العسكرية والمؤسسات الأمنية فالثقة بدورهم ومسؤولياتهم عالية جدا حماة الوطن فخرنا وعزتنا لكن بدي اختم بذكر اسماء اثنين فقط على سبيل المثال يذكرهم الناس في جلساتهم ولقاءاتهم ممن تميزوا في الأداء والعطاء والقيام بواجباتهم كما يجب وهما معالي يوسف العيسوي رئيس ديوانكم العامر ودولة الدكتور جعفر حسان رئيس الحكومة وفقهم الله .
